Alla Itolae Nusa 9

Eleki Alla Iriluke misete ete Nu kai eni nanaru, Ibeteke lokosi be, “Imi anubu boboka leke esi penue pusu nusa meije.

Kai pusue binatane mei nusa; pusue manua ndete tetuaru, pusue rebe ualeli kai pusue iana ndau meite, rilalu le ale titinai. Kai pusue meru akbasaelu.

Pusue yelu rebe ualeli kai esi nasite mere imi manane. Le Au riluke pusue meru ete imi saka tnanelaru neka.

Batuke aklaline rebe esi lalakwe rua sare, imi kane yake le mere sakesa kai esi nasite rua sa.

Kai papela tamata ibunu tamata pise binatane ebunu tamata, Au hukume tamata mere imata pise binatae mere emata.

Sire pine ibunu tamata hoko ile mere isupu bunu bei tamata makete lekwe. Le Au tolae tamatare lupe Aure neka.

Imi anubu rame kai tapa boka rame, eti sae ineheke tekwa imi mei nusa moneka. Yele suke imi tapa boka rame mei nusa.”

Eleki Alla Ibeteke loko Nu kai eni nanaru, rebe esi sakesa kaine be,

“Lene mimise! Meije Au taluke misete kai ale kai imi anubuaru,

kai pusue rebe ukwana, rebe usakesa kai imire: manue, binatana rebe pialaelu kai rebe pialaelu more rebe mei nusa meije. Mere, pusue rebe usiri bei kapale sakesa kai imire.

Hoko Au taluke misete kai imi bei bei meije kwele elolo suike moneka kena eatia pusue rebe esi nasite, kai kwele lolo suike kena eatia nusare moneka.”

Kai Alla Ibeteke be, “Meije lisi eti pela be Au taluke misete kai imi kai taneia rebe esi nasite, rebe usakesa kai imire.

Hoko Au tolae tabalakwe kena moputire leke eono lisi ete Au kai nusa.

Hoko sepo Au ono moputire ndete lanite pine selu tabalakwe kena moputire,

hoko Au nete suike loko saisa rebe Au taluke kai imire, kai pusue taneia rebe esi nasite be atia suikelu kena kwele moneka.

Sepo tabalakwe kena moputire hoko Au selue hoko Au nete loko Au taluke kai pusue tanei rebe nasi mei nusare eti pelare.”

Eleki Alla Ibeteke loko Nu be, “Meije Auku lisi kena Au taluke misete kai taneia rebe esi nasite mei nusa meije.”

Nu eni nanaru, rebe esi siri bei kapale, Seme, Yapeta kai Hame. Hame mere tatike pine eni anubuaru kena tamata Kananaru.

Sie telua meru Nu eni nanae, telusi anubuaru kena pusue tamata mei nusa.

Nu mere tamata maka andinu, ile pine tamata maka atnane anggure memenaije.

Kena rebai sae me Nu ikinu anggure, inseli hoko ilesu pusue eni lapunaru eleki intulu kalakue me eni tenda laleije.

Hoko Hame rebe tatike pine iono ntua mena ete tamata Kanane, iselu amai kalakure eleki isiri kai ialenake ete kwalini luaru.

Eleki Seme kai Yapeta luasi rana obite nurui sae, luasi tataele eleki esi kerike me malaisu kai luasi keu atulie eti eobi amaisi hoko luasi selu ikalakure mo.

Eleki kena Nu eni nselite rirae, ibetu, ilene be eni nanae mulire ialenakeni,

hoko ibeteke be,

“Kutuke kena Kanane,

kai namake kwalinisi onoi kena tamata makerike rebe eni kbasa sae kwale moneka.”

Kai ibeteke lekwe be, “Isike TUHANE, Seme eni Alla!

Namake Kanane iono tamata makerike rebe eni kbasa sae kwale moneka ete Seme.

Alla Iriluke misete ete Yapeta noma.

kai eni anubuaru esi rue sakesa kai Seme eni anubuaru kena esi tendaru.

Bei kwele lolo nusa pelare, Nu irue musuna utuna telu lesi butu lima lekwe.

Hoko Nu eni musuna utuna sikwa lesi butu lima mina pine imata.